ನಿನಗೆ ಬಾಲ್ಯದ ನೆನಪು; ಮೋಡದುಯ್ಯಾಲೆಯಲಿ
ತೂಗುತಲಿ ಬಾಗುತಲಿ ಆಡುತಿರುವೆ;
ಮುತ್ತಿನಲಿ ಸಿಂಗರಿಸಿ ಇಟ್ಟ ತೊಟ್ಟಿಲಿನಿಂದ
ಒಡೆದು ಹನಿಗಳ ತೆರನೆ ಚಿಮ್ಮುತಿರುವೆ.
 
ಸಂಜೆಯಲಿ ತಂಗಾಳಿ ಹೀಗೆ ಹನಿಗಳ ಸವರಿ
ಎದೆಗೆ ಮುಟ್ಟಿಸಬಹುದೆ, ಹೇಳು ನಲ್ಲೆ;
ಒಂದಿಷ್ಟು ತಡೆದುಕೋ ಬಿರುಸಾಗಿ ಬರಲಿ ಮಳೆ
ನದಿಯ ಸೇರುವ ವರೆಗೆ ಕಾಯಬಲ್ಲೆ.
 
ಹಸಿನೆಲದ ಮೇಲಿಷ್ಟು ನಡೆದಾಡಿ ಪುಲಕದಲಿ
ಮನದ ಕೆಸರನು ಇಳೆಗೆ ದೂಡುವಾಸೆ;
ಮೇಲುನೋಟಕನಾಗಿ ಮಳೆಗೆ ಕಣ್ಣೀರಿಡಲು
ಇಳಿಯದಂತೆಯೆ ತಡೆವ ಮೊಗದ ಮೀಸೆ!
 
ಅದೆಷ್ಟೊ ಸೊರಗಿರುವ ತರುಲತೆಯ ಮೈದಡವಿ
ಮತ್ತೆ ಚಿಗುರಿಸುವಂತೆ ಮಾಡುವವಳೆ;
ತಬ್ಬಿಕೊಳ್ಳಲು ಬೇಡ, ತೊಳೆದುಬಿಡು ಪೂರ್ಣದಲಿ
ಸವಿದುಬಿಡು ನನ್ನನ್ನು ಮೋಹದಮ(ವ)ಳೆ.
water dew photography
Photo by Achilles Kastanas on Pexels.com

By : Ishwara Bhat K

Advertisements

2 thoughts on “ಮಳೆಯೆಂಬವಳಿಗೆ.”

  1. ಸುಂದರ ಭಾವಗೀತ… ಈಶ್ವರ ಭಟ್.
    ಗೆಳೆಯ ಶಶಿಕಿರಣ ಆನೆಕಾರ ಈ ಗೀತಕ್ಕೆ ಉದಯರವಿಚಂದ್ರಿಕೆ (ಶುದ್ಧಧನ್ಯಾಸಿ) ರಾಗವನ್ನಾಧರಿಸಿ ಸ್ವರಸಂಯೋಜನೆ ಮಾಡಿ ಹಾಡಿರುವುದನ್ನೂ ನಿನ್ನೆ ಕೇಳಿದೆ.

Leave a Reply

This site uses Akismet to reduce spam. Learn how your comment data is processed.